Psa 138 | PONPDN | STEP | I KAPINGA komui sang nan mongion i, i pan kakaule kin komui mon dikedik en ani kan.

Psalms 138

1 I KAPINGA komui sang nan mongion i, i pan kakaule kin komui mon dikedik en ani kan.
2 I pan kakaudok inen wong sapwilim omui im en kaudok saraui, o kapinga mar omui, pweki omui kalangan o melel, pwe kom kotin kalinganada mar omui sang meakaros ki omui masan.
3 Ni ai likwir wong komui, komui ap kotin mangi ia, o kom kamanada mongion i melel.
4 Maing leowa, nanmarki en sappa karos pan kapinga komui, ni ar pan rong masan en silang ir.
5 O re pan kauleki al en leowa kan, pwe lingan en leowa meid laud.
6 Pwe leowa me lapalap ap kotin irerong me tikitik kan, o a kotin mangi me aklapalap, sang ni wasa doo.
7 Ni ai weweid nan kamasak melel, kom kin kotin kolekol ong ia maur i, o kom kin kapa wong lim omui pan makar en ai imwintiti kan, o kom saunsa ia da ki lim omui maun.
8 leowa pan kotin wiawia ia. Maing leowa, omui kalangan me pan potopot eta; Kom der kotin muei sang dodok en lim omui kan.